ရှေးဟောင်းယဉ်ကျေးမှုတွေ များစွာ ကိန်းဝပ်နေတဲ့ မြန်မာတို့ရဲ့ အထင်ကရ တန်ဖိုးထားရတဲ့ ပုဂံဒေသဟာ မြန်မာ့ယဉ်ကျေးမှုအမွေအနှစ်အဖြစ်သာမက နိုင်ငံတကာက ခရီးသွားဧည့်သည်တွေအတွက်လည်း စိတ်ဝင်စားဖွယ်ရာမြို့တစ်မြို့လည်းဖြစ်ပါတယ်။
ဒါပေမဲ့ ပုဂံဒေသဟာ အခုဆိုရင်တော့ အာဏာသိမ်းစစ်တပ်နဲ့ ဒေသခံလက်နက်ကိုင်တပ်ဖွဲ့တွေရဲ့ နှစ်ဖက်တင်းမာမှုကြားမှာ မလွန်းသာ မလူးသာအခြေအနေတစ်ခုရောက်နေတယ်လို့ ဆိုရမှာပဲ ဖြစ်ပါတယ်။
နိုင်ငံခြားခရီးသွားဧည့်သည်လာရောက်မှု မရှိသလောက် နည်းပါးသွားတဲ့အပြင် ပြည်တွင်းခရီးသွား၊ ဘုရားဖူးတွေဝင်နေဆဲဆိုပေမယ့်လည်း မိုးဦးအစမှာ မိုးရွာသွန်းမှုကြောင့် ခပ်ကျဲကျဲလာ လာရောက်ကြပါတယ်။
ခရီးသွားမြို့ဖြစ်တာနဲ့အညီ ဧည့်သည်ဝင်ရောက်မှု နည်းပါးလာတာနဲ့အမျှ ဒေသခံတွေရဲ့ စီးပွားရေးနဲ့ ဝင်ငွေဟာလည်း သိသိသာသာကို ထိခိုက်မှုတွေ ရှိလာခဲ့ရပါတယ်။
ပုဂံဒေသရဲ့ ဧရာဝတီမြစ်တစ်ဖက်ကမ်းမှာရှိတဲ့ တန့်ကြည်တောင်ဘက်ခြမ်းမှာ မကြာခဏဆိုသလို တိုက်ပွဲသံများကြားနေရဆဲ ဖြစ်ပါတယ်။
အဲဒါကြောင့်လည်း ဗူးဘုရားကနေ တန့်ကြည်တောင်စေတီတော်ကို သွားတဲ့ရေလမ်းခရီးကို အခုအချိန်ထိ ပိတ်ထားဆဲပဲ ဖြစ်ပါတယ်။
ပုဂံဘုရားဖူးသွားတဲ့သူတွေအနေနဲ့လည်း စွယ်တော်လေးဆူထဲက တစ်ဆူဖြစ်တဲ့ တန့်ကြည့်တောင်စေတီကိုလည်း သွားရောက်ဖူးမြော်ချင်ကြမှာဖြစ်ပေမယ့် ဖူးမျှော်ခွင့် မရရှိခဲ့ကြတော့ပါဘူး။
မကြာခင်ပွင့်လင်းရာသီရောက်တော့မှာဖြစ်သလို သီတင်းကျွတ်မီးထွန်းပွဲတော်လို့ အခါကြီးရက်ကြီးပွဲတော်တွေ၊ ပိတ်ရက်ရှည်တွေ ရောက်တော့မှာမို့ ဒေသခံတွေအတွက် ခရီးသွားများများ ဝင်လာနိုင်ဖို့ဆိုတာ မဝံ့မရဲနဲ့ မှိတ်တုတ်တုတ် မျှော်လင့်ချက်ပဲ ဖြစ်နေခဲ့ပါတယ်။
တိုက်ပွဲတွေ ပိုမို ပြင်းထန်လာတဲ့ နှစ်ဖက်တင်းမာမှုကြားမှာ ခရီးသွားတွေများများဝင်လာဖို့ဆိုတာလည်း
ဘယ်လောက်ထိ လုံခြုံမှု၊တည်ငြိမ်မှုရှိလဲဆိုတဲ့ အချက်ပေါ် မူတည်နေတာလည်း အမှန်ပါ။
ထိုသို့သော အခြေအနေများနဲ့ လက်ရှိပုဂံဒေသမြင်ကွင်းများကို ပုဂံချစ်သူများအတွက် ဖော်ပြလိုက်ရပါတယ်။
