စားသုံးသူဈေးကွက်အတွင်း ထိုင်းကုန်စည်တွေပြတ်လပ်လာတာကြောင့် မြန်မာထုတ်ကုန်တွေနဲ့ အစားထိုးမှုများရှိလာတယ်လို့ ဝယ်ယူသုံးစွဲသူတွေထံကနေ သိရပါတယ်။
ထိုင်း – မြန်မာ အမှတ်(၂) ချစ်ကြည်ရေးတံတားကို စစ်တပ်ကပိတ်လိုက်ပြီးနောက်ပိုင်း ဈေးကွက်ထဲမှာ ပစ္စည်းရှားပါးခြင်းနဲ့ ပစ္စည်းပြတ်လပ်မှုတွေဖြစ်ပေါ်ခဲ့ပါတယ်။
” အခုဆိုပစ္စည်းတွေကပြတ်သွားပြီ။ City Mart တွေမှာဆိုရင် မြန်မာထုတ်ကုန်တွေနဲ့အစားထိုးလာတာတွေရှိတယ်။ အိမ်သုံးကုန်ပစ္စည်းတွေဆိုရင် ပြတ်ကုန်တာ။ အမျိုးသမီးသုံးတွေကအစ။ အခုတော့ Made in Burma ကိုပဲသုံးရတော့တာပေါ့” လို့ အိမ်ရှင်မတစ်ဦးကပြောပါတယ်။
ပြည်တွင်းထဲမှာထုတ်လုပ်တဲ့ပစ္စည်းတွေကလည်း ပြည်ပကနေကုန်ကြမ်းမှာယူရတာကြောင့် လတ်တလောမှာအခက်အခဲတွေဖြစ်နေတယ်လို့ ဆိုပါတယ်။
ကွာလတီကောင်းမွန်တဲ့ ပစ္စည်းတွေကို ပြည်တွင်းထဲမှာ မထုတ်လုပ်နိုင်တာကြောင့် ပြည်ပကနေ လူသုံးကုန်ပစ္စည်းတွေကို တင်သွင်းနေရတာဖြစ်ပါတယ်။
စစ်တပ်အနေနဲ့ တရားမဝင်ကုန်စည်တင်သွင်းမှုကိုအကြောင်းပြပြီး နယ်စပ်သွင်းကုန်တင်သွင်းမှုတွေကို ထိန်းချုပ်လိုက်တာဖြစ်ပါတယ်။
” ရုတ်တရက်ပိတ်ချလိုက်တော့ ပြည်တွင်းထဲမှာကအခက်အခဲတော့ဖြစ်သွားတယ်။ ပြန်တော့ဖွင့်မှာပါ။ အဓိက ပြည်တွင်းထုတ်ကုန်တွေကို အားပေးရာရောက်တာပေါ့” လို့ ကုန်သည်စက်မှုအသင်းချုပ်က တာဝန်ရှိသူတစ်ဦးကပြောပါတယ်။
နယ်စပ်သွင်းကုန်တွေကို ရုတ်တရက်ပိတ်လိုက်တာကြောင့် ဈေးကွက်ထဲမှာ ပစ္စည်းပြတ်လပ်မှုတွေဖြစ်ပေါ်နေတဲ့အပြင် ယခင်ထက်ဈေးနှစ်ဆမြင့်တက်လာမှုတွေရှိပါတယ်။
ယင်းမှ အမျိုးသမီးတွေ လစဉ်အသုံးပြုနေရတဲ့ လစဉ်သုံးပစ္စည်းတွေကလည်း ပြတ်လပ်မှုတွေဖြစ်ပေါ်နေတာကြောင့် ပြည်တွင်းထုတ်ပစ္စည်းတွေကိုသာ ဈေးကြီးပေး၍ ဝယ်သုံးနေရတယ်လို့ သိရပါတယ်။
” အရင်ကတော့ ထိုင်းဘက်ကဝင်တဲ့ပစ္စည်းကိုပဲသုံးတာ။ အခုကျတော့ မြန်မာထုတ်ပဲသုံးရတယ်။ ကွာလတီကတော့ သိပ်မကောင်းဘူးပေါ့။ ပြောရရင်အရည်အသွေးကလည်းညံ့တယ်။ မတတ်နိုင်ဘူး ဒါလေးပဲသုံးနေရတာပေါ့” လို့ အမျိုးသမီးငယ်တစ်ဦးကပြောပါတယ်။
